Հրատարակութիւն

PDF

Կենտրոնական Վարչութիւն

Շաբաթ 14 յուլիսի 2018 թ.-ին «Արարատ» մարզաւան այցելեցին՝ Թեհրանի Քաղաքապետարանի Մարզանքի Կազմակերպութեան նախագահ ՝ դոկտ. Հասանին ու նրան ընկերակցող պատւիրակութիւնը: Կազմակերպութեան կողմից նրանց դիմաւորեցին Կենտրոնական վարչութեան նախագահ՝ ընկեր Գէորգ Վարդանը, նոյն կազմի անդամ՝ ընկեր Արբի Սարգսեանը եւ Մարզաւանի վարիչ՝ ընկեր Սեւան Ծառուկեանը:

 

 

 Երէկ ,չորեքշաբթի յուլիսի 4 ,2018 թ.-ի ժամը 20:00- ին տեղի ունեցաւ Հ.Մ. «Արարատ»Կազմակերպութեան հիմնադրման  և գործունէութեան 74 - ամեակի տօնակատարութիւնը ,«Արարատ»մարզաւանի Այգեստանի շրջափակում:

Միջոցառմանը ներկայ էին Առաջնորդական փոխանորդ՝ Տ.Եպիսկոպոս Մակար Աշկարեանը,ազգային մարմինների ներկայացուցիչները,Վարչականները,միութենականներն ու հիւրերը:

«Արարատ» երգչախումբը ղեկավարութեամբ՝  Արփի Նազարեանի ,Դաշնակագար՝ Ալին Թաշճեան,միջոցառումը մեկնարկեց Տէրունական աղօթքով ապա Սկաուտական միութեան թմբկահարները ներս բերելով Կազմակերպութեան դրօշը երգչախմբի կատարողութեամբ,Արարատի հիմներգի ներքոյ ծածանեցին Կազմակերպութեան դրօշակը:

«Հայաստան ջան» պարով, հանդէս եկաւ «Արարատ » պարախմբի թիւ3 խումբը:

Այնուհետև երգչախումբը կատարեց չորս երգեր՝

Եաման եար,Հոյ իմ նազանի եարը,Երևան   և Սարդարապատ:

Ցուցարդրւեց Կազմակերպութեան 2017  յուլիսի  առ 2018 յուլիսի  մէկ ամեայ աշխատանքային տեսաերիզը:

Այնուհետև օրւայ առիթով իր խօսքը արտայայտեց Կենտրոնական Վարչութեան նախագահ ՝ընկեր Գէորգ Վարդանը ,ապա ամբիոնի մօտ հրաւիրւեց Տէր Մակար Աշկարեանը օրւայ առիթով արտայայտւելու:

Այնուհետև հարթակ բերւեց 74- ամեակի գեղեցիկ տորթը և Կենտրոնական Վարչութեան հրաւէրով հատման համար  հրաւիրւեցին հիմնադիր անդամը նախքին  Կենտրոնական Վարչութեան նախագահները և  օրւայ  Կենտրոնական Վարչութեան ընկերները:

Ծրագրի աւարտին բոլորը հրաւիրւեցին  Ս.Խաչ մատուռի շրջափակում համեստ ընդունելութեան:

Մտերմիկ մթնոլորտում տարեդարձը շարունակւեց մինչև ուշ գիշեր:

Օրւայ հաղորդավարներն էին  ընկերներ ՝ Գարունէ Բանդարին և Էմիլ Սէթխանեանը:

 

Կենտրոնական Վարչութեան խօսք՝ Հ.Մ.Արարատ Կ.-ի 74-րդ տարեդարձին

 

 

Թեհրան- Իրան

 

2018- Արարատ մարզաւան

 

 

 

Գերաշնորհ Սրբազան Հայր, Թեմական, Ազգային ու Միութենական մարմինների յարգելի ներկայացուցիչներ, Արարատական ընկերներ եւ սիրելի հիւրեր, բարեկամներ,

 

Ընկերական անկեղծ օղակ ենք կազմել նշելու՝ Հայ Մշակութային «Արարատ» Կազմակերպութեան հիմնադրման 74-րդ տարեդարձը:

 

Թւերն ունեն իրենց խորհուրդը ու դրանց մէջ խորանալով շատ բաներ են իմաստաւորւում: 1944 թւականին երբ աշխարհը վարակւած համաշխարհային պատերազմով ապրում էր անակնկալներով ու սահմանափակումներով խառն օրեր: Իրանահայութեան խիզախ ու հեռատես ռահվիրաների մի փաղանգ անձնականին ուշադրութիւն դարձնելու փոխարէն հաւաքականին անդրադառնալով՝ հիմիքը դրեց հայակերտման այն հնոցին որն այսօր զարգանալով եւ ընդարձակւելով հայկական իրականութեան մէջ իր ուրոյն ձեռագիրն է դրոշմում, համայնքի ու ժողովրդի կողմից նրա հասցէին ունեցած վստահութեան եւ համագործակցութեան շնորհիւ:

 

Թոյլ տւէք նախքան ամեն խօսք «Արարատ»-ի մեծ ընտանիքի անունից համեստաբար խոնարհւել մեր հիմնադիր ընկերների կամքի հզօրութեան ու նրանց մտային հորիզօնի վեհութեան առջեւ: Նրանցից ոմանք այսօր արդէն առյաւետ հեռացել են մեզնից բայց եւ բարեբախտաբար որոշները դեռ ընկերակցում են մեզ:

 

Այն օրերին կարելի էր ուրիշ ձեւ մտածել եւ այլ ուղղութեամբ լարել կամքն ու հզօրութիւնը: Բարեսիրական մի ինչ որ աշխատանքի հիմքը դնել կամ զբաղւել մարդասիրական ազգօգուտ այլ գործերով: Սակայն նրանց նպատակն աւելին էր քան մասնաւորին  հետեւելը, նրանք որպէս «Արարատ»-ի նպատակ բերեցին հետեւեալը՝

 

«...Հայ սերունդներին տալ ազգային առողջ գաղափարաբանութիւն եւ հասարակական առողջ ըմբռնումներ, արթուն պահել հայրենասիրութեան եւ ազգասիրութեան ոգին, մղել ազգային իրաւունքների պաշտպանման պայքարին, փոխանցել ժողովրդավարութեան էութիւնը, բարձրացնել ազատութեան պաշտպանութեան եւ հասարակական պարտականութիւնների գիտակցութիւնը»:

 

Եւ ահա այսօր 74 տարիներ անց մենք կանգնած ենք այստեղ.

 

Իրանցիների յարգանքի, պետութեան նրբանկատութեան, թեմական կառոյցի վստահութեան, ժողովրդի օժանդակութեան եւ միութենականների տքնաջան աշխատանքների շնորհիւ՝ փարթամ, ծաղկուն, շքեղ եւ ամենակարեւորը հայկականութիւն բուրող «Արարատ» մարզաւանում եւ հապարտ համեստութեամբ ուզում ենք զեկուցել որ.

 

Սկաուտական կեանքում՝

 

Մեր Սկաուտները պատրաստւում են Հայաստան մեկնել անկախութեան 100 ամեակին նւիրւած բանակումին մասնակցելու:

 

Մարզական ասպարէզում՝

 

Մեր ֆուտբալիստները կանգնած են Թեհրան նահանգի բարձրագոյն լիգայի առաջին չորս հզօրների շարքում:

 

Մեր բասկետբալիստ տղաները տուն բերեցին Իրանի «Յոյսի լիգայ» անւանակոչւած բարձրացոյն մրցութիւնների գաւաթը, հզօրագոյնի պատւանդանին կանգնելով:

 

Մեր բասկետբալիստ աղջիկները կանգնած են Թեհրան նահանգի առաջին լիգայի հզօրների շարքին:

 

Մեր վալիբալիստ աղջիկները համեստօրէն համարւում են Թեհրան նահանգի լաւագոյն մարզիկուհիներից:

 

Արւեստի աշխարհում՝

 

Մեր նազելի պարուհիները իրենց հայկական նազանքով ապշեցրել են բոլորին եւ ահաւասիկ տուն են վերադարնում Վրաստանից իրենց հետ բերելով պարի միջազգային փառատօնին լաւագոյններից լաւագոյնին տրւած՝ յաղթութեան գաւաթը:

 

Իսկ Երէցների օջախում՝

 

74 ամեայ այս կաղնու բունը համարւող մեր սիրելի ընկերները շարունակում են իրենց ազգանւէր ու տիտանական աշխատանքերով բարձր պահել՝ ազգային ինքնագիտակցութեան եւ պատկանելիութեան գերարժէքները...

 

Եւ դեռ նշւածները փոքրիկ նշոյլը պիտի համարել այն յաղթութիւնների բոյլից որոնց արժանեցել է մեր մեծ ընտանիքը շնորհիւ Ձեր պաշպանութեանն ու հոգատարութեանը, որի համար մեր երախտապարտ ու մշտական շնորհակալութիւններն ենք բարձրաձայնում:

 

Սիրելի բարեկամներ՝

 

Մեր օրագիրը ունեցել է նաեւ դառը պարտութեան տողեր: Կծկւել ենք՝ ընկերներ կորցնելու ցաւից, լացել՝ մրցութիւնը յանձնելու ափսոսանքից, տրտմել ենք երբ չենք յաջողել ուզածի պէս ծառայել համայնքին, ամաչել ենք երբ՝ պատասխան չենք ունեցել դրսեւորած մարդկային մեր սխալների համար... Կծկւել ենք, լացել, ամաչել. Բայց երբէք ենք ընկճւել ու յուսախաբւել, քանզի մեր պարտութիւններն ուսումնասիրելով ճիշտ ճամբաներ ենք գտել իսկ մեր սխալներին գիտակցելով քաջաբար ենք ներողամտութիւն հայցել: Ու դա արել ենք միասնութեան տեսլականով զինւած ու փորձել ենք լինել միասին ու կազմել միակամ ճակատ դժւարութիւնները դիմագրաւելու պահին:

 

Տարեդարձները մարդուս անցեալը, ներկան ու ապագան իրար հանգուցող պահերն են իսկ մարդկային կեանքը անցեալի, ներկայի եւ ապագայի հանրագումարը իր լաւ ու վատ, ուրախ եւ տխուր, յաղթութեան եւ պարտութեան պահերով կամ դրւագներով:

 

Արարատի 74 ամեայ անցած ուղղին ուսումնասիրելով ու նրա ներկան ճիշտ գնահատելով պիտի համոզւել որ անկախ բոլոր վերիվայրումներից նա հաւատարիմ է մնացել  իր նպատակային երթին եւ սերնդափոխւած ղեկավարութիւնները շարունակել են հայակերտման ուղղու վրայ պահել Կազմակերպութեան հսկայ գնացքը:

 

Այսօր եւս մեր ծննդավայր հայրենիք՝ Իրանը անակնկալներով յղի եւ պարտադրւած դժւարութիւններով ծանրացած օրեր է ապրում, հետեւաբար մեզ հարկ է միաւորելով մեր մտքերն ու կարողութիւնները աչալրջօրէն հետեւել տարածաշրջանային եւ համաշխարհային իրադարձութիւններին ու եթէ պէտք է փոփոխութիւններ տալով մեր ընթացիկ աշխատանքներում ու ապրելաոճում, լաւագոյնս ապահովել փորձենք իրանահայութեան ապահովութիւնն ու անդորրը: Չմոռանա'նք, որպէս Հայաստանի հետ միակ սահմանակից հայկական համայնքը, մեր գոյատեւումն ու կայունութիւնը պարտադիր ազդակ է համարւում ազգային պետականութեան բարգաւաճման համար:

 

Տարածաշրջանում առկայ ցնցումներից զերծ մնալը բնականաբար անհնար է սակայն մեր համայնքի ցնցումներն ընդունելու եւ դժւարութիւնները շրջանցելու ունակութիւնը կարելի է զարգացնել միասնական ծրագրերով որտեղ դերաբախշումը կատարւած կլինի ըստ կարողութիւնների եւ տարողութեան մակարդակի:

 

Արարատ Կազմակերպութիւնը պատրաստ է ինչպէս միշտ իր պարտականութիւնների բաժինն ստանձնել յանուն մեր ժողովրդի բարօրութեանն ու խաղաղ առաջընթացքին:

 

Հաւատացած ենք «Բարձրացի'ր բարձրացո'ւր»՝ մեր «Արարատական» քայլքին,

 

Հպարտ ենք «Սիրենք իրար»՝ մեր ծառայողական կոչումով,

 

Եւ վստահ ենք որ պիտի դիմագրաւել կարողանանք բոլոր մարտահրաւէրները՝ լինելով միասին եւ շրջանցել անկարելիների սահմանը Յոյսի, Հաւատքի ու Սիրոյ հզօրութեամբ,

 

Սկսել ենք մեր հիմնադիրների խրոխտ անցեալից, շարունակում ենք նրանց մօտ աշակերտած մեր ներկայով ու կկերտենք մեզ վայել Հայի Յաղթական ապագան...

 

Շնորհաւոր տարեդարձդ Արարատ

 

Յաջողութիւն բոլորիս:

 

 

 

 

 

Հ.Մ.«Արարատ» Կ.

 

Կենտրոնական Վարչութիւն

 

Հ.Մ.«Արարատ»Կ.-ի 

Մարզաւանում՝ «Այգեստան»-ի ընթրիք երեկոների բացումը տեղի է ունենալու՝
սոյն թւականի հինգշաբթի ,յունիսի 14-ի 2018 թ.-ին :
Տեղեկութիւններ ստանալու և սեղան ապահովելու համար զանգահարէք 88030224-7

  Մայիս 28-ի, օրւայ բանախօս՝ ընկեր Գէորգ Վարդանի արտայայտած բանախօսութիւնը՝

 

28 Մայիսի տօնակատարութիւն

 «Արարատ» մարզաւան

 28 Մայիս, 2018

 

     «Ձերդ  գերազանցութիւն,  որպէս  Հայաստանի  մայրաքաղաքի  զինւորական հրամանատար`  ողջունում  եմ  ձեր  գալուստը:  Ես  անսահման  երջանիկ  եմ,  որ դարերից յետոյ առաջին սպան եմ, որ խոնարհեցնում է իր սուրը իր կառավարութեան առջեւ: Այս վայրկեանիս ես հպարտութեամբ դնում եմ սուրս իր պատեանի մէջ եւ դուրս  կը  հանեմ  այն  ժամանակ,  երբ  դուք  հրամայէք  պաշտպանել  մեր  աննման հայրենիքը»:

 

 

 

Հանդիպում

 

Հ.Մ.Ա.Կ.-ի Կենտրոնական վարչութիւնը սոյն թւականի մայիսի 5-ին հանդիպեց ԱՄՆ-ի Արեւմտեան Շրջանի Հ.Մ.Ը.Մ.-ի «Արարատ» մասնաճիւղի անդամ, նոյն միութեան Կանոնագրային յանձնախմբի նախագահ եւ «Շամլեան» Հայոց դպրոցի Հոգաբարձրութեան նախագահ՝ ընկեր Արմէն Աբրահամեանին: Հարկ է նշել յիշեալը  եղել է ԱՄՆ Արեւմտեան Շրջանի Հ.Մ.Ը.Մ.-ի վարչութեան նախագահ եւ վեց շրջան «Արարատ» մասնաճիւղի նախագահ:

«Արարատ»Մարզաւանի նորակառոյց «Ռոստոմ Ոսկանեան»  համալիրը յարմարեցւեց  Հայաստանից ժամանած ՝«Թաթուլ Ալթունեան»-ի անւան  երգի-պարի անսամբլի մէկ շաբաթեայ բնակութեան համար  :

 

 

 

2018 թւականի ապրիլի 15-ի կիրակի օրը ժամը 19:30-ին «Արարատ»մարզաւանի վերակառուցւած «Մեջնունեան»սրահում Կենտրոնական Վարչութեան հրաւէրով տեղի ունեցաւ կազմակերպութեան հերթական Միջվարչական հանդիպումը ,որի օրակարգն էր՝ միութիւնների,մարմինների ,յանձնախմբերի և Կենտրոնական վարչութեան զեկուցումները նաև եղան մտքերի փոխանակումներ և առաջարկներ յառաջիկայ աշխատանքների համար :

Հայաստանի Առաջին Հանրապետութեան հիմնադրման 100-ամեակին նւիրւած ծառատունկը տեղի ունեցաւ համայնքիս գրեթէ ողջ պատասխանատուների նախաձեռնութեամբ:

Ծառատունկին՝ Թ. Հ. Թ. թեմակալ առաջնորդի, Թեմական խորհրդի ատենապետի, ինչպէս նաեւ 100-ամեակի յանձնախմբի ներկայացուցչի կողքին մասնակցեցին Թեմական խորհրդի միւս անդամները, առաջնորդական փոխանորդը, «Ալիք» հաստատութեան ներկայացուցիչը, Հ.Մ.Ա.Կ.-ի Կենտրոնական վարչութեան եւ ազգային մարմինների ներկայացուցիչները, ինչպէս նաեւ Հ.Մ.Ա.Կ.-ի Սկաուտական միութիւնը՝ լիակազմ:

Սրբազան Հօր ձեռամբ հողին ամրացւած առաջին տնկիի մերձաւորութեանը տեղադրւեց նաեւ մի յուշատախտակ՝ 100-ամեակին նւիրւած այս միջոցառման մասին բացատրութեամբ:

Հայաստանի Հանրապետութեան հիմնադրման 100-ամեակը նման իրադարձութեամբ նշանաւորելու գաղափարը գնահատելով իմաստալից եւ գործի էութեանը համապատասխանող քայլ, Սրբազան Հայրը նշեց, որ արարողութիւնը սկաուտների «Սարդարապատ»-ի կատարմամբ պաշտօնական երանգ ստանալով, իւրաքանչիւրին ստիպեց մտածելու այն մասին, թէ Սարդարապատը կերտողները հայրենիքի ապագայի արմատներն էին ամրացնում հայրենի հողի վրայ:

Իրադարձութեան աշխուժութիւնը շարունակւեց սկաուտական խմբերի անմիջական մասնակցութեամբ, որտեղ իւրաքանչիւր խումբ միասնականութիւնը խորհրդանշող աշխուժութեամբ իր տնկին ամրացրեց հողին:

Ծառատունկը նախաձեռնող պատասխանատուներից մէկն «Ալիք»-ի լրագրողին յայտնեց, որ ծառատունկի արդիւնքում շուրջ երեսուն տնկիներով համալրւեց մարզաւանի կանաչ գօտին, որտեղ քառասուն տարւայ ընթացքում պահպանւել եւ մշակւել են աւելի քան 2 հազար ծառեր, հիմնականում չինարիներ: Նոյն պատասխանատուն յաւելեց նաեւ, որ նախատեսւում է տնկիների քանակը հասցնել 100-ի, որը իրականացւելու է գալիք օրերի ընթացքում:

Լուրը քաղւած է «Ալիք»-ից

Սիրելի հայրենակիցներ
Ուրախութեամբ յայտնում ենք, որ
Բասկետբոլի Ֆեդերացիայի նախագահ՝ դկտ.Ռամին Ահմադի Թաբաթաբայիի հրամանագրով պրն.Վրէժ Աբկարեանը նշանակւեց որպէս ԻԻՀ Բասկետբոլի ֆեդերացիայի իրաւարարների և մրցումների կոմիտէի պատասխանատու:
Հրամանագրում նշւած է՝«Վրէժ Աբկարեան, դուք ձեր կարողութիւնների, փորձառութեան ու մասնագիտական արժանիքների բերումով արժանի էք ստանձնելու այս պատասխանատւութիւնը »:
Հարկ է նշել որ Վրէժ Աբկարեանը նախապէս ևս զբաղեցրել է իրաւարարների կոմիտէի պատասխանատւութիւնը:
Հ.Մ.«Արարատ»Կ.

Սիրելի հայրենակիցներ,
Ուրախութեամբ յայտնում ենք Թալին Թահմասեանի ձեռքբերումը

Բասկետբոլի ֆեդերացիայի նախագահ՝ Դկտ.Ռամին Ահմադի Թաբաթաբաիի ,հրամանագրով Թալին Թահմասեանը նշանակւեց ֆեդերացիայի օրդ. բասկետբոլի իրաւարարների և մրցումների բաժնի պատասխանատու :
Թալին Թահմասեանը արդեն մի քանի շրջան է ինչ անդամ է «Արարատ»ի Մարզական միութեան բասկետբոլի յանձնախմբին :
Շնորհաւորում ենք սիրելի Թալինին և մաղթում նորանոր յաջողութիւններ կեանքի բոլոր ասպարէզներում:
Հ.Մ.«Արարատ»Կ.

Էջ 1, 21-ից