«ԱԼԻՔ», Կ. Դ. - 70-ամեայ, բայց երիտասարդական աւիւնով առլեցուն: Հ. Մ. «Արարատ» կազմակերպութեան յոբելենական ամեակը նշւեց արժանւոյն: Միջոցառումը իրենց ներկայութեամբ պատւել էին Մեծի Տանն Կիլիկիոյ Ն.Ս.Օ.Տ.Տ. Արամ Ա Վեհափառ Հայրապետը, ՀՀ Սփիւռքի նախարարը, իրանահայ երեք թեմերի հոգեւոր առաջնորդներն ու հոգեւոր հայրեր, Կաթողիկէ համայնքի, Հայ Աւետարանական եկեղեցու հոգեւոր առաջնորդներ, Իրանում Հայաստանի Հանրապետութեան եւ Ռուսաստանի Դաշնութեան դեսպանները, Իսլ. խորհրդարանում իրանահայ պատգամաւորները, «Ալիք» հաստատութեան ներկայացուցիչները, ազգային իշխանութեան ու միութիւնների ներկայացուցիչներ, արտերկրից հրաւիրւած հիւրեր եւ հոծ թւով բազմութիւն:
Յայտագիրը մեկնարկեց Հայաստանի Հանրապետութեան վաստակաւոր արտիստուհի Աննա Մայիլեանի եթերային ձայնով հնչեցրած «Տէրունական» աղօթքով: Ապա գեղեցիկ մտայղացմամբ «Արարատ»-ի հիմնը հնչեցրին «Արարատ» երգչախումբը եւ Հ.Մ.Ա.Կ.-ի երէց ու ներկայ սերունդի ներկայացուցիչները: Երգչախումբը կատարեց նաեւ այլ երգեր՝ խմբավարութեամբ Արաքս Խաչատրեանի եւ դաշնամուրի կատարում՝ Ռեբեկա Աշուղեանի:
Միջոցառումը յագեցած էր ելոյթներով, «Արարատ»-ի 70-ամեայ գործունէութիւնը պատկերող տեսաֆիլմի ցուցադրութեամբ, եւ բացառիկ գեղարւեստական կատարումներով՝ ղեկավարութեամբ Սեդրակ Գոջամանեանի: Կազմակերպիչ յանձնախմբի անունից ներկաներին ողջոյնի խօսք ասաց Կարինէ Ղարախանեանը: Ապա հրաւիրւեց արտայայտւելու Հ.Մ.Ա.Կ.-ի Կենտրոնական վարչութեան նախագահ Համլետ Խալոյեանը: Նա կարեւորութեամբ անդրադարձաւ բոլոր նրանց, որոնց անխոնջ ջանքերի ու անձնազոհութիւնների շնորհիւ «Արարատ»-ը նշեց իր հիմնադրման ու գործունէութեան 70-ամեակը:
Օրւայ առիթով իրենց պատգամները յղեցին հիւրաբար Իրան ժամանած «Համազգային»-ի կրթական եւ մշակութային միութեան Կենտր. վարչութեան ներկայացուցիչ՝ Սպարտակ Ղարաբաղցեանը եւ Հայ Մարմնակրթական ընդհանուր միութեան Կենտր. վարչութեան ատենապետ՝ Գառնիկ Մկրտչեանը: Արտայայտւելու համար բեմ հրաւիրւեց Հայաստանի Հանրապետութեան Սփիւռքի նախարար Հրանուշ Յակոբեանը: Նա դրւատանքով խօսեց կազմակերպւած միջոցառման մասին եւ բարձր գնահատեց իրանահայ համայնքի անմնացորդ դերը՝ Իրան-Հայաստան յարաբերութիւնների առաւել սերտացման ի խնդիր:
Նախարարը երախտագիտութեան խօսք ասաց Իրանի Իսլ. Հանրապետութեանը, որը Հայաստանի Հանրապետութեան անկախացումից ի վեր միշտ եղել է յուսալի բարեկամ եւ հարեւան երկիր Հայաստանի համար: Նախարարը բարձր գնահատեց Հ.Մ.Ա.Կ.-ի հայապահպանման դերը:
Նախարարը նաեւ փոխանցեց ՀՀ վարչապետի յուշանւէրը եւ ընթերցեց ՀՀ նախագահի հրամանագիրը համաձայն որի՝ Հայաստան-Սփիւռք կապերի ամրապնդման եւ հայապահպանման գործում ներդրած նշանակալի աւանդի համար՝ Հ.Մ.Ա.Կ.-ի Կենտր. վարչութեան նախագահ եւ Հայաստան-Իրան մշակութային եւ մարզական կապերի յանձնախմբի նախագահ՝ Համլետ Խալոյեանը, պարգեւատրւել է «Մովսէս Խորենացի» շքանշանով:
Ապա յղւած բազմաթիւ ուղերձներից ընթերցւեց երեքը՝ ՀՀ մշակոյթի նախարար Յասմիկ Պօղոսեանի, Համահայկական համաշխարհային կոմիտէի նախագահ Իշխան Զաքարեանի եւ Հ.Մ.Ա.Կ.-ի հիմնադիր վարչութեան անդամ Սեպուհ Յովհաննիսեանի:
Գեղարւեստական յայտագրում «Արարատ» արւեստի դպրոցի թատրոնի սաները, Սեդրակ Գոջամանեանի, Արտոյտ Զոհրաբեանի ու Փրենի Գոլազիզեանի եւ փոքր սաների պատկերաւոր կատարմամբ ներկայացրին Հ.Մ.Ա.Կ.-ի հիմնադրումն ու գործունէութիւնը, որը զուգորդւած էր «Արարատ» պարախմբի կատարումներով ղեկավարութեամբ՝ աւագ պարուսոյց Անահիտ Աւետեանի:
Խմբին երաժշտական կատարումներով ընկերակցում էին՝ Արին Մելիքեանը եւ Սեւան Շամիրեանը, որոնք 70-ամեակին նւիրւած երգի ու երաժշտութեան համահեղինակներն էին:
Ծրագրի ընթացքում հրաւիրւեց արտայայտւելու Թ. Հ. թեմի առաջնորդ Տ. Սեպուհ արք. Սարգսեանը, որը ողջունելով Հ.Մ.Ա.Կ.-ի 70-ամեակը՝ այն համարեց փոքրիկ ովազիս իրանահայութեան եւ ի մասնաւորի թեհրանահայութեան կեանքում:
Սրբազան Հայրը բեմ հրաւիրեց Մեծի Տանն Կիլիկիոյ կաթողիկոս Ն.Ս.Օ.Տ.Տ. Արամ Ա Վեհափառ Հայրապետին իր պատգամը յղելու համար: Վեհափառ Հայրապետը, իր արտայայտութիւնների ընթացքում կարեւորութեամբ անդրադարձաւ հայ իրականութեան մէջ «Արարատ» անւան վեհութեանը, եւ այդ անւան հետ կապւած գաղափարների իրականացմանը եւ աւելացրեց. «Երանի այն կազմակերպութեանը, որ «Արարատ» անունով է մկրտւած: Դիւրին չէ «Արարատ» անուն կրել դիւրին չէ «Արարատ»-ը ապրիլ, դիւրին չէ «Արարատ»-ը ապրեցնել մեր կեանքի մէջ: Ես վստահ եմ, որ «Արարատ» կազմակերպութիւնը այդ գիտակցութեամբ փորձեց 70 տարիներ շարունակ «Արարատ»-ը ապրիլ ու «Արարատ»-ը ապրեցնել Իրանի հայութեան կեանքի մէջ»:
Վեհափառ Հայրապետի արտայայտութիւններից յետոյ թէ՛ տեսաֆիլմի, եւ թէ՛ պատկերաւոր ձեւով ներկայացւեցին Հ.Մ.Ա.Կ.-ի գործող տարբեր միութիւնները:
Իսկ վերջում տեղի ունեցաւ սկաուտական երդման արարողութիւն:
Միջոցառումը աւարտւեց ընդունելութեամբ, ուր եւ հնչեցին շնորհաւորանքներ:
