Print this page
Չորեքշաբթի, 24 Դեկտեմբեր 2014 18:29

Հ. Մ. «Արարատ» Կ.-ի 70-ամեակին նւիրւած խորհրդաժողով՝ Թեհրանում «Արարատ» մարզաւանում

Rate this item
(1 Vote)

 

 

 

Հ. Մ. «Արարատ» Կ.-ի 70-ամեակին նւիրւած խորհրդաժողով՝ Թեհրանում «Արարատ» մարզաւանում


«ԱԼԻՔ», Կ. Դ. - Հ.Մ.Ա.Կ.-ի համար 2014 թւականը նշանաւորւեց կազմակերպութեան հիմնադրման ու գործունէութեան 70-ամեակի նշումով:
70-ամեայ յոբելեան, որը ցայսօր տօնւել է բազմաթիւ գեղարւեստական մարզա-մշակութային միջոցառումներով, իսկ որպէս համալրող աշխատանք, թւականիս դեկտ. 18-ին եւ 19-ին, կազմակերպւել էր երկօրեայ խորհրդաժողով հետեւեալ խորագրով՝ «70-ամեայ փորձ, նոր սերունդ, նորանոր յաջողութիւններ»:
«Արարատ»-ի հիմնով «Շահբազեան» սրահում մեկնարկած խորհրդաժողովի բացման հանդիսութեանը խորհրդաժողովի դիւանից Հենրիկ Խալոյեանը, նշեց որ խորհրդաժողովը նպատակ է հետապնդում քննարկելու խնդիրներ, որոնք այսօրւայ համաշխարհայնացած աշխարհում, մեր դիմաց են ծառացած եւ որոնք քիչ թէ շատ ազդում են մեր սերունդի վրայ եւ ինչու ոչ տարւող աշխատանքներին: Նշւեց նաեւ, որ խորհրդաժողովները լաւագոյն առիթ են՝ գիտական մակարդակով խորքային եւ համապարփակ քննարկումների, որը խիստ կարեւոր է ու անհրաժեշտ եւ առաւել արդիւնաւէտ, եթէ առաջարկութիւնները ունենում են գործնական բնոյթ:
Ապա հրաւիրւեց արտայայտւելու Հ.Մ.Ա.Կ.-ի Կենտր. վարչութեան նախագահ Համլետ Խալոյեանը: Նա հակիրճ բացատրութիւններ փոխանցեց «Համազգային»-ի, ՀՄԸՄ-ի եւ «Արարատ»-ի վերջին տարիների համագործակցութեան, եւ «Արարատ»-ի անցած 70-ամեայ գործունէութեան մասին:
Օրւայ առիթով հրաւիրւեց արտայայտւելու՝ Թեհրան հրաւիրւած «Համազգային»-ի նախագահ՝ Մկրտիչ Մկրտչեանը, որը կարեւորեց վերանորոգ աշխատանքով լծւելու անհրաժեշտութիւնը:
Բացման հանդիսութեան եզրափակիչ խօսքով հանդէս եկաւ Թ. Հ. թեմի առաջնորդ Տ. Սեպուհ արք. Սարգսեանը: Թեմակալ առաջնորդը ողջունելով «Արարատ»-ի 70-ամեակը նաեւ այդ ամեակը բովանդակալից միջոցառումներով նշող Կենտրոնական վարչութեանը եւ յանձնախմբին, կարեւորեց միութիւնների դերը՝ համայնքային կեանքը աշխուժացնելու եւ հայեցի ոգով նոր սերունդին դաստիարակելու առումով:

141220a02a

Այնուհետեւ ժողովն անցաւ ճշտւած օրակարգերին: «Համաշխարհայնացում եւ նոր արժեհամակարգերում ազգային-հասարակական կազմակերպութիւնների դերն ու դիրքը» բնաբանով արտայայտւեցին Սուրիկ Աբնուսեանը եւ Սեւան Պետրոսեանը, «Իրանի եւ իրանահայութեան կացութիւն՝ ազգային կառոյցներ եւ մարզա-մշակութային միութիւններ ու Հ.Մ.Ա.Կ.-ն» գլխի տակ արտայայտւեց «Ալիք» օրաթերթի գլխաւոր խմբագիր Դերենիկ Մելիքեանը, իսկ նոյն թեմայով Նոր Ջուղայից գրաւոր զեկոյց էր ուղարկել Սպահանի հայոց թեմի Թեմական խորհրդի ատենապետ Նոէլ Մինասեանը: Երիտասարդութեան ու պատանեկութեան հոգեբանական առանձնայատկութեան, դաստիարակութեան եւ իրանահայ երիտ-պատանեկութեան գլխի տակ արտայայտւեցին Բիայնա Ամիրեանը եւ Այրինա Նորավեանը: Նշենք, որ իւրաքանչիւր զեկուցաբերի արտայայտութիւնից յետոյ, ներկաներին առիթ էր տրւում հարցումների ու տեսակէտների փոխանակման:
Խորհրդաժողովը երկրորդ օրւայ առաւօտից իր աշխատանքը ծաւալեց յանձնաժողովների շրջագծում, որոնց աշխատանքն ընթանում էր մարզաւանի տարբեր սրահներում. զեկուցաբերների զեկոյցները ներկայացւելուց յետոյ, հարցերի ու առաջարկների ձեւով ընթանում էին թէժ քննարկումներ՝ հետեւեալ թեմաներով՝ Հ.Մ.Ա.Կ.-ի կազմակերպական կառոյցը եւ տնտեսա-ֆինանսական իրավիճակը, Իրանում մարզա-մշակութային միութիւնները եւ նրանց օպտիմալ գործունէութեան անհրաժեշտութիւնը, ախտաճանաչում եւ դրական ու բացասական գործօններ, նորօրեայ հնարաւորութիւնների օգտագործում, ապագայի հեռանկար եւ այլն: Երկօրեայ խորհրդաժողովը աւարտւեց համապատասխան բանաձեւերի մշակմամբ:

 

 

 

Last modified on Չորեքշաբթի, 24 Դեկտեմբեր 2014 18:30