Ատրպատական, ազգային առաջնորդարան - Մինչեւ Համբարձման տօն Ս. Յարութեան յաղթական մթնոլորտում՝ Հ.Մ.Ա.Կ.-ի Թաւրիզի մասնաճիւղի Երէցների միութեան կազմակերպութեամբ ուրբաթ, մայիսի 8-ի կէսօրին, «Արարատ»-ի Թաւրիզի կենտրոնատեղիում կազմակերպւել էր ճաշկերոյթ, հովանաւորութեամբ Ատրպատականի հայոց թեմի առաջնորդ՝ Տ. Գրիգոր եպս. Չիֆթճեանի եւ Թեմական խորհրդի:
Առաջնորդ Սրբազան Հայրի հետ ներկայ գտնւեցին Թաւրիզի հոգեւոր հովիւ՝ Տ. Առաքել քհնյ. Տմտմեանը, «Արարատ»-ի Թաւրիզի մասնաճիւղի վարչականներ, ազգային իշխանութեան անդամներ, արարատականներ եւ թաւրիզահայեր:
Բացման խօսքը Երէցների միութեան անունից փոխանցեց Անիտա Գէորգեանը, բացատրելով հաւաքի ուրախալի առիթը: Նա բարի գալուստ մաղթելով աւանդական դարձած այս ճաշկերոյթի մասնակիցներին, շնորհակալութիւն յայտնեց բոլոր նրանց, ովքեր նպաստել էին կազմակերպական աշխատանքներին:
Սեղանավարութիւնը ստանձնեց Նժդիկ Աբրահամեանը, ով անդրադառնալով Հայոց Ցեղասպանութեան 100-րդ տարելիցի առիթով աշխարհին մեր Դատը ճանաչեցնելու եւ մեր եկեղեցու դերակատարութեանը, բարձր գնահատեց Մեծի Տանն Կիլիկիոյ կաթողիկոսութեան եւ նրան զինւորագրւած Միաբանների ներդրումը, սկսած Ն.Ս.Օ.Տ.Տ. Արամ Ա կաթողիկոսից: Ապա, տեղական մակարդակում կարեւորելով «Արարատ» կազմակերպութեան դերակատարութիւնը, նա շեշտեց հայ երիտասարդութեան կեանքում նրա շարունակւող դաստիարակչական ծառայութիւնը:
Արտայայտւեց նաեւ Պատգամաւորական ժողովի ատենադպիր Արմինէ Վահրամեանը, վեր հանելով «Արարատ» կազմակերպութեան անփոխարինելի դերը թաւրիզահայ կեանքում: Նա շնորհաւորեց բոլորին Ս. Զատիկի տօնի առիթով եւ շեշտեց եկեղեցական տօների բերած խանդավառութիւնը մեր ազգային հասարական կեանքում: Շնորհակալութեան ու երախտի քի խօսքերով հանդէս եկաւ «Արարատ»-ի Թաւրիզի մասնաճիւղի վարչութեան նախագահ՝ Հենրիկ Աբրահամեանը: Նա միշտ աշխոյժ ու պատրաստակամ ներկայացրեց «Արարատ»-ը իր բոլոր յանձնախմբերով, համայնքի կեանքը առոյգ պահելու յանձնառութեամբ: Նա յուշանւէրներ յանձնեց առաջնորդ Սրբազան Հօրը, ինչպէս նաեւ քահանայ հօրը, առաւել նւիրեալ ծառայութիւն մաղթելով նրանց Ատրպատականի հայոց թեմում:
Գեղարւեստական ծրագրին երգերով իրենց մասնակցութիւնը բերեցին Միրօ Աբրահամեանը, Քաթրին Փասէֆեանը եւ Սաթիկ Աբրահամեանը:
Առաջնորդ Սրբազան Հայրը իր եզրափակիչ օրհնութեան խօսքում գնահատեց տեղի ունեցած ճաշկերոյթի կազմակերպական աշխատանքը իրականացրած բոլոր անհատներին, եւ մտերմական միջավայրը լաւագոյն վկայութիւն նկատեց համայնքի առողջութեան. «Իրարմով հետաքրքրւելը, նոյնիսկ չափազանց, դրական նշան եմ համարում փոքրաթիւ մեր համայնքում, որովհետեւ հակառակը՝ անտարբերութիւնը, աւելի վտանգաւոր ու մեզ ջլատող դերակատարութիւն կարող է ունենալ: Մենք ո՛չ ի պաշտօնէ, ո՛չ էլ պարտադրաբար ենք եկել այստեղ, այլ՝ եկել ենք, որովհետեւ ԱՐԱՐԱՏ կազմակերպութիւնը մեր հարազատ տունն ու ընկերական առողջ միջավայրն ենք համարում», ասաց Սրբազան Հայրը:
Աւարտին տեղի ունեցաւ նաեւ վիճակախաղ, ի նպաստ կազմակերպութեան ծրագրերի իրագործման: Ընդհանրապէս համայնքի զաւակներին ի մի բերելու եւ մասնաւորաբար կազմակերպութեան անդամների հանդիպման առիթ հանդիսանալու, Երէցների միութեան այս ձեռնարկը յաջողւեց իր նպատակում:
