Խաղերը նւիրւած էին Արարատական վաղամեռիկ ընկեր՝ Արթին Նազարեանի յիշատակին: Հանգուցեալ Արթին Նազարեանը ծնւել էր 1973 թւին Թեհրանում մանուկ հասակից իր ընտանիքի հետ փոխադրւել է Թաւրիզ, պատանի տարիքից անդամակցել էր Հ.Մ.Ա.Կ.-ի Թաւրիզի Մասնաճիւղի բասկետբոլի խմբին, ունեցել էր բարձր մարզական ոգի, եղել էր վեհանձն մարդ ու լաւ մարզիկ, սակայն կեանքը դաժան գտնւեց իր հանդէպ եւ երկարատեւ հիւանդութիւնից յետոյ իր մահկանացուն կնքեց 2011 թւին Թեհրանում:
Խաղերին մասնակցում էին Մասնաճիւղիս բասկետբոլի երիտասարդական խումբը, Թաւրիզի Թալարէ աֆթաբ, Ալթըն բիր յոլ եւ Թաւրիզի բասկետբոլի պատանեկան խմբերը: Հանդիսութեանը ներկայ էին՝ Ատրպատականի Հայոց Թեմի Առաջնորդ՝ Գերպ. Տէր Գրիգոր Ծայրագոյն Վարդապետ Չիֆթճեանը, Թեմական խորհրդի անդամները, Թաւրիզի բասկետբոլի ընկերութեան նախագահ Պրն. Փադաշը եւ Նազարեան ընտանիքի կողմից ներկայացուցիչներ:
Բացման հանդիսութիւնը պաշտօնապէս սկսւեց Հ.Մ.Ա.Կ.-ի Թաւրիզի Մասնաճիւղի սկաուտների դրօշակի արարողութեամբ: Դրօշակի արարողութիւնից յետոյ բարիգալստեան խօսքով հանդէս եկաւ ընկ. Կարէն Սարգսեանը, ապա խօսք առաւ մասնաճիւղիս Վարչութեան նախագահ՝ ընկ. Նժդիկ Աբրահամեանը, նա անդրադարձաւ Հ.Մ.Ա.Կ.-ի 70-ամեայ ու Թաւրիզի մասնաճիւղի 60-ամեայ պատմութեանը եւ Իրանի ու Թաւրիզի մարզամշակութային կեանքում ունեցած ներդրմանը, նաեւ յիշատակեց հանգուցեալ ընկ. Արթին Նազարեանի միութենական անցեալը:
Ներկաներին իր ողջոյնի խօսքը ուղեց Պրն. Փադաշը, կարեւորելով նկատելով համայնքների միջեւ երիտասարդական նման հանդիպումները, յատկապէս մարզական ասպարէզներում:
Ծրագիրը պարունակում էր նաեւ գեղարւեստական բաժին, որտեղ պարսկերէն ու հայերէն երգերի կատարումներով ելոյթ ունեցան միութեանս անդամներ դոկտ. Յովիկ Գալստեան եւ Միրօ Աբրահամեանը, Կարէն Սարգսեանի ու Արին Նաւասարդեանի նւագակցութեամբ։
Օրհնութեան խօսքով իր եզրափակիչ պատգամը փոխանցեց Ատրպատականի Հայոց Թեմի Առաջնորդը գնահատելով Հ.Մ.Ա.Կ.-ի Կենտրոնական եւ Թաւրիզի Մասնաճիւղի վարչութեանը եւ անդամներին, որոնք տարիների իրենց փորձառութիւնը Իրանի Իսլամական հանրապետութիւնում, միշտ դրական գործունէութեամբ են իրականացրել, նոր սերնդին ֆիզիքական ու նկարագրային կազմաւորում տալով եւ պատրաստելով տիպար քաղաքացիներ: «Այս Կազմակերպութիւնը մշակութային ու մարզկան տարբեր նախաձեռնութիւնների ճամբով ահաւասիկ 70-տարիներից ի վեր ընդհանրապէս Իրանում, եւ 60-տարիներից ի վեր յատկապէս Թաւրիզում նոր սերնդի կազմաւորումով է զբաղւում: «Արարատ»-ը մի դպրոց է, որի ուսուցիչները մեծ թէ փոքր միմեանցից սովորելիք ունեն: Այդ ուսուցիչներից ոմանք արդէն ցաւօք հանդերձեալ կեանքում են գտնւում: Դրանցից է վաղամեռիկ Արթին Նազարեանը, որ հակառակ իր կարճատեւ կեանքին, իր վարքով ու «Արարատական»-ի բարձր գիտակցութեամբ, այսօր յետմահու դարձեալ իր յիշատակով ուսուցանում է նոր սերնդին՝ սիրել այս Կազմակերպութիւնը իբրեւ մի անգրասեղան դպրոց, ու օժանդակել դրա վերելքին», ասաց Թեմակալ Առաջնորդը: Ապա նրա ձեռամբ յիշատակի նւէր յանձնւեց Արթին Նազարեանի հարազատ ընկեր՝ Կարէն Մկրտիչեանին:
Խաղերը կայացան երեք օր տեւողութեամբ եւ եզրափակւեցին շաբաթ հոկտ. 5–ին: Փակման հանդիսութեան ընթացքում Թաւրիզի Մասնաճիւղի Վարչութեան անունից հանդէս եկաւ մասնաճիւղիս Վարչութեան անդամ ընկ. Կարօ Ջորջեանը ուր նշեց, թէ վերջին երեք օրերին, «Արարատ»-ի մարզադաշտում կայացած մրցումները աւանդական իրենց բնոյթով արդէն հոգեհարազատ են դարձել բոլորի համար: Ապա, հրաւիրեց թեմակալ առաջնորդին, փոխանցելու իր պատգամը եւ կատարելու մրցանակաբաշխութիւնը:
Թեմակալ առաջնորդը գնահատեց «Արարատ»-ի կողմից ցուցաբերւած եղբայրական ոգին՝ հանդէպ իրանցի եղբայրներին ու քոյրերին, որոնց ուղղւած հրաւէրը, միասին լինելու եւ մարզական ոգով մի քանի օրեր անցկացնելու, «ինքնին փոխադարձ յարգանքի ու սիրոյ արտայայտութիւն է: Սա էլ մի տեսակ երկխօսութիւն է քրիստոնեայ եւ իսլամ կրօնների միջեւ: Փոխադարձ յարգանքը եւ սէրը սկսում են գործնական աշխատանքով՝ փոխգործակցութեամբ, այլապէս մնալու են տեսական գաղափարներ միայն» ասաց նա: Այս առիթով նա իր բարձր գնահատանքը յայտնեց նաեւ «Արարատ»-ի վարչութեան նախագահ Նժդիկ Աբրահամեանին եւ վարչական ու միութենական բոլոր անդամներին, իրենց նւիրումի եւ Կազմակերպութիւնը առոյգ պահելու համար:
Ապա տեղի ունեցաւ մրցանակաբաշխութիւնը: Գնահատւեց «Արարատ»-ի մարզիչ՝ Յովիկ Ղուկասեանը, եւ միւս խմբերի մարզիչները, ինչպէս նաեւ իրաւարարները, որոնք համբերութեամբ երեք օրեր շարունակ անսակարկ նւիրումով ու արդարութեամբ կատարեցին իրենց պարտականութիւնը: Իսկ յաղթանակի գաւաթը իր հետ տուն տարաւ «Ալթըն Բիրյօլ» խումբը: Ներկայ մարզասէրները դաշտը թողեցին քաղցր յուշերով, ու առաջիկայում նոր յաղթանակներ ապահովելու վճռակամութեամբ:
