ՄԷԿՕՐԵԱՅ ՇՐՋԱԳԱՅՈՒԹԻՒՆ «ԱՐԱՐԱՏ» ՄԱՐԶԱՒԱՆՈՒՄ
Ուրբաթ յունիսի 13 –ին, Հ.Մ.Ա.Կ.—Ի 70–ամեակի յանձնախմբի նախաձեռնութեամբ և Կրթական Խորհրդի հետ նախապէս կատարւած համադրութեամբ, Սասուն և Ահարոնեան մանկապարտէզների և Շանթ ու Գիւլբենգեան դպրոցների հայ ուսուցչական, տեսչական և ծնողական խորհուրդների կազմերից՝ 20 հոգի, յանձնախմբի ուղեկցութեամբ, շրջեցին Արարատ մարզաւանում և ծանօթացան Հ.Մ.Ա.Կ.—ի կառոյցի, տարբեր միութիւնների ու բաժինների աշխատանքների դժւարութիւնների ու մտահոգութիւնների հետ։
Ընդհանրապէս Արարատ մարզաւանը, իրանահայութեան և յատկապէս Թեհրանահայութեան համար «երկրորդ տուն» է համարւում։ Օրական հազարաւոր հայեր, յատկապէս ամռան սեզոնին անարգել, տարբեր առիթներով ելումուտ են անում Մարզաւան և օգտւում առկայ հնարաւորութիւններից, սակայն քչերը գիտեն թէ այդ ամբողջ հնարաւորութիւնները ինչպէս է ստեղծւել և պահպանւում։
Այս այցելութիւնները կազմակերպելով, յանձնախումբը նպատակ ունի, հաճելի ժամանցի կողքին մեր հասարակութեան տարբեր խաւերի ներկայացուցիչներին Մարզաւան հրաւիրելով, մօտիկից և ուղղակի շփումով, իրազեկել կատարւող աշխատանքների, ապագայ ծրագրերի, առկայ դժւարութիւնների և խոչնընդոտների մասին։
Այս ծրագիրը շարունակելի է և առաջին փուլում ընդգրկելու է բոլոր հայոց դպրոցները։