17-րդ նստաշրջան
1962 մայիս - 1965 նոյեմբեր
* 1962-ի ապրիլի 6-ին, ժամանակաւոր շրջանի դիւան-վարչութիւնը գտնելով որ՝ իր գործունէութեան ժամանակամիջոցում, իրեն եւ կամ անհատ միութենականների վստահւած շփումները բաւականաչափ արդիւնաւորւել են եւ տեսակէտները հասունացել են մասամբ, հրաւիրել է ԺԷ Ընդհանուր ժողով:
Ժողովը մի քանի հերթական նիստերում, հանգամանօրէն քննարկելով այն բոլոր անհարթութիւններն ու խնդիրները, որոնք առաջացել էին միութեան կեանքում, որպէս լաւագոյն լուծում գոյութիւն ունեցող հակասութեանց եւ դժւարութիւնների, յանգել է այն եզրակացութեան, որ միութեան մէջ կառուցային փոփոխութիւն կատարելը խիստ անհրաժեշտ է:
Առ այդ՝ ընտրել է մի լիազօր Կենտրոնական վարչութիւն, որին պարտականութիւն է տւել՝ բազմակողմանի ուսումնասիրութեան ենթարկելու կառուցային այդ փոփոխութիւնը, ինչպէս միութիւնը վերածելու կազմակերպութեան, իսկ գոյութիւն ունեցող բաժանմունքները՝ միութիւնների՝ իրենց անջատ վարչութիւններով ու ներքին կանոնագրութեամբ եւ ենթակայ մի կենտրոնական վարչութեան՝ իհարկէ ապակենտրոն սկզբունքով:
Նորընտիր Կենտրոնական վարչութիւնը պարտականութիւն է ունեցել նաեւ կազմելու նոր կանոնագիր՝ կատարւելիք հիմունքային փոփոխութեան համաձայն:
Ժողովը նկատի առնելով այն պարագան, որ նոր կառոյցը երկարատեւ փորձարկման է կարօտում՝ առաջանալիք բարդութիւնները չէզոքացնելու եւ տարւելիք աշխատանքները հունաւորելու տեսակէտից, ճշտել է միայն հիմնական սկզբունքներն ու վարչական կառոյցը՝ ընդհանուր գծերով եւ վերջնական ձեւակերպումը թողել է Կենտրոնական վարչութեան՝ ըստ գործադրութեան ընթացքում առաջացած պահանջների:
Լիազօր Կենտրոնական վարչութիւնը, իր երեք տարի եւ եօթն ամիս երկարատեւ գործունէութեան ժամանակաշրջանում, իր լաւագոյնն է փորձել եւ յաջողել է նոր կառոյցի հետեւանքով առաջացած բոլոր դժւարութիւնները վերացնել եւ աշխատանքները դնել բնականոն հունի մէջ:
Կազմել է Հ.Մ.Ա.Կ.-ի նոր կանոնագիրը՝ բաղկացած 67 յօդւածներից եւ 29 ծանօթագրութիւններից. նաեւ միութիւնների ներքին կանոնագրերը:
Նոր կանոնագրերը ունեցել են այն առաւելութիւնը, որ փորձնական բովից անցնելով՝ յղկւել եւ մշակւել են կատարելապէս:
Կենտրոնական վարչութիւնը գտնելով որ՝ լիովին կատարել է իրեն վստահւած պարտականութիւնները, 1965-ի նոյեմբերին, նոր Կանոնագրի տրամադրութեան համաձայն՝ միութիւնների պատգամաւորների մասնակցութեամբ գումարել է կազմակերպութեան անդրանիկ Պատգամաւորական ժողովը, ուր զեկուցել է իր բարոյական ու նիւթական գործունէութեան մասին եւ ներկայացրել է իր հրաժարականը:
Ա Պատգամաւորական ժողովը վաւերացրել է կազմակերպութեան նոր կանոնագիրը:
Այսպիսով՝ Հայ մշակութային «Արարատ» միութիւնը անւան փոփոխութիւն է կրել նաեւ ու դարձել է Հայ մշակութային «Արարատ» կազմակերպութիւն:
Սոյն շրջանի վարչական կազմ է ընտրւել ըստ հետեւեալի՝
Նախագահ՝ Վաչիկ Ղարաբէգեան
Քարտուղար՝ Վաչիկ Խաչատրեան
Գանձապահ՝ Խաչիկ Շատիկեան
Վարիչ-գործավար՝ Էմիլ Մարգարեան
Հրայր Մարուխեան
1964-ի նոյեմբերի 26-ին, Սամուէլ Սարուխանեանը, Ժոռէս Աբրահամեանը եւ Ալէք Տէր-Պօղոսեանը հրաւիրւել են կազմի մէջ:
* 1964-ի յուլիսի 4-ին մեծ շուքով տօնակատարւել է Հայ մշակութային «Արարատ» կազմակերպութեան հիմնադրման 20-ամեակը եւ այդ առիթով հրատարակել է մի գրքոյկ, որը կազմել եւ խմբագրել է Նորայր Պահլաւունին, իսկ շապիկը ձեւաւորել է Սեդրակ Նազարեանը:
* Հ.Մ.Ա.Կ.-ի հրաւէրով, 1963 թւականին երկրորդ անգամը լինելով, Թեհրան է ժամանել Բէյրութի «Համազգային»-ի «Գասպար Իփէկեան» թատերախումբը, ղեկավարութեամբ Ժորժ Սարգսեանի եւ «Արարատ»-ի բեմում ներկայացրել է՝ «Օսքար»-ը եւ «Հին աստւածներ»-ը:
* 1964 թւին իր երկրորդ այցելութիւնն է ունենում Հայաստանի Հանրապետութեան վերջին վարչապետ Սիմոն Վրացեանը եւ դասախօսութիւններով ելոյթ է ունենում «Արարատ»-ի բեմից: Այդ շրջանում Ս. Վրացեանը Բէյրութի «Համազգային»-ի «Ն. Փալանճեան» ճեմարանի տեսուչն էր:
* 1964-ին Հ.Մ.Ա.Կ.-ի հրաւէրով, սեպտեմբեր ամսին, Թեհրան է ժամանել Բէյրութի «Համազգային»-ի «Ն. Փալանճեան» ճեմարանի գրականութեան ուսուցիչ Գրիգոր Շահինեանը։: Նոյն թւականին, երկրորդ անգամը լինելով, Թեհրան է ժամանել բէյրութահայ ասմունքող Յակոբ Կիւլոյեանը:
* 1965 թ. մարտ ամսում Բէյրութից Թեհրան է ժամանել անւանի մտաւորական, ազգային հասարակական գործիչ, հռետոր, գրական եւ գրախօսական ընդունակութիւններով օժտւած Բաբգէն Փափազեանը եւ ունեցել է դասախօսութիւններ՝ «Արարատ»-ի սրահում: