Հայաստանում Հ.Մ.Ա.Կ.-ի 70-ամեակը նշող յանձնախմբի նախագահ՝ Արմինէ Մանուկեանը տեղեկացնում է՝
Հ.Մ.Ա.Կ.-ի 70 ամեակին նւիրւած աշխատանքների, կարելի է ասել, որպէս աւարտական ծրագիր այս անգամ, Հոկտեմբերի 4-ին, 50 հոգուց բաղկացած մի խմբով այցելեցինք Պարոյր Սևակի ծննդավայր՝ Զանգակատուն գիւղը:
Նախ այցելեցինք Պ. Սևակի թանգարան, որտեղ մեծ հետաքրքրութեամբ լսեցինք թանգարանի տնօրէն՝ Պրն. Ավետիք Գրիգորեանի բացատրութիւնները և թանգարանին նւիրեցինք 1981 թւին Թեհրանում հրատարակւած բանաստեղծի «Ա...նլռելի զանգակատուն» և «Հատընտիր» հատորներից մէկական օրինակներ, Արարատ Կազմակերպութեան 60-ամեակի գիրքը և 70-ամեակը խորհրդանշող կրծքանշանը: Ապա, այցելեցինք մեծն բանաստեղծի շիրիմին, այնուհետև Զանգակատուն գիւղի միջնակարգ դպրոց, որտեղ սովորել է մեր մեծ ուսուցիչ- բանաստեղծը, և որտեղ այսօր նոյնպէս սովորում են 172 աշակերտ:
Բարև…
Պ.Սևակի այս բանաստեղծութեամբ դիմաւորեցին մեզ, և մենք մեծ յուզմունքով ականատեսը եղանք մեզ համար պատրաստւած գեղարւեստական ծրագրին: Այնուհետև շատ ջերմ մթնոլորտում հիւրասիրւեցինք, և մօտիկից շփւեցինք նոր ծանօթացած բայց արդէն մեզ համար շատ հարազատ և հին բարեկամների հետ:
Այցելեցինք շատ լաւ վերանորոգւած մարզական սրահը, որը Արարատ Կազմակերպութեան և անդամների նւիրատւութիւնների միջոցներով համալրւեց մարզական և ժիմնաստիկայի գոյքերով:
Մեր ընկերները, Արարատ մարզաւանի մարզական սրահների կարօտը առին, դպրոցի աշակերտների հետ վոլիբոլ խաղալով. իսկ վերջում բոլորս միասին երգեցինք Մեր Հայրենիքը և բաժանվեցինք, յիշելով բեմից հնչած Պ. Սևակի խօսքերը:
Ու թե սիրում ենք,
Մեր սրտի բոլոր լարերով սիրենք,
Ու թե սիրում ենք,
Եօթ տարիս որն է , դարերով սիրենք:
Ճանապարհը շարունակելով Արէնիում մասնակցեցինք «Գինու Փառատօն»-ին, որտեղ տիրում էր, ուրախ, հարբեցնող, հայրենասիրական երգ ու պարի տաք մթնոլորտ, որտեղից հեռացանք լաւ յուշերով, ոմանք մի քիչ գինովցած, ոմանք էլ գինու շիշերը ձեռքերին, ամբողջ ճանապարհին հայրենասիրական, ժողովրդական երգեր երգելով:
