Հայ Մշակութային Արարատ Կազմակերպութիւնը

տօնեց իր 62-րդ տարեդարձը

Հայ Մշակութային Արարատ Կազմակերպութիւնը երեքշաբթի, յուլիսի 4-ի երեկոյեան, մեծ թւով միութենականների եւ հրաւիրեալների ներկայութեամբ, լողաւազանների շաջափակում տօնեց իր հիմնադրութեան 62-րդ տարեդարձը:

Օրւայ հաղորդավարն էր Թալին Բաղումեանը: Հնչեց <Արարատ>-ի հիմնը, ապա Ռուբինա Գալստեանն ընթերցեց բացման խօսքը, որից յետոյ <Արարատ> Կազմակերպութեան Կենտրոնական Վարչութեան նախագահ Հենրիկ Խալոյեանը իր ողջոյնի եւ շնորհաւորանքի խօսքն ուղղեց ներկաներին: Գեղարւեստական բաժնում կատարումներով ելոյթ ունեցան նոյն Կազմակերպութեան <Արարատ> պարախմբի սաները, որոնց պարուսոյցն է Հայաստանի վաստակաւոր արտիստուհի Կարինէ Ղազարեանը:

Հիմնադիր անդամների, Կենտրոնական Վարչութեան նախագահի եւ Հ.Մ.Ա.Կ.-ի չորս միութիւնների նախագահների միջոցով խանդավառ մթնոլոտում հատւեց 62-րդ ամեակը խորհրդանշող տորթը եւ հրամցւեց ներկաներին:

Իսլ. Խորհրդարանի հիւսիսային իրանահայութեան պատգամաւոր եւ նոյն կազմակերպութեան տարիների անդամ ճրտգ. Գէորգ Վարդանեանը արտայայտւեց օրւայ առիթով եւ նշեց. <Այս հաւաքականութիւնը իրապէս դպրոց է եւ հնոց, որտեղ կոփւում են մարդիկ՝ ծառայելու համար իրենց ժողովրդին: Այս հնոցի մէջ կոփւած բազում անդամներ այսօր պատասխանատու դիրքեր են գրաւում թէ Իրանում, եւ թէ Սփիւռքի տարբեր ծայրերում: Քայլենք երկար տարիներ, քայլենք խրոխտ ու աննկուն քայլերով՝ մինչեւ կիրականանան մեր ժողովրդի բոլոր իղձերը>:

Հանդիսութեան վերջում Էդւին Հայրապետեանի ղեկավարութեամբ նւագախումբը հնչեցրեց ուրախ երգեր, որի առթած խանդավառ ու աշխոյժ մթնոլորտում հանդիսականների խրախճանքը շարունակւեց մինչեւ ուշ գիշեր: