Հ.Մ.Ա.Կ.-ի “Արարատ” պարախմբի ելոյթները՝
Երեւանում եւ Էջմիածնում

Վանուշ Խանամիրեան՝
“Այս խումբը առանց վարանելու կարող է
աշխարհը պտտել”

Սոյն թւի սեպտեմբերի 10-ին, Երեւանի Ստանիսլաւսկու անւան դրամատիկական թատրոնի շուրջ 650 տեղանոց լեփլեցուն սրահում, տեղի ունեցաւ Հ.Մ.Ա.Կ.-ի “Արարատ” պարախմբի ելոյթը, որի գեղարւեստական ղեկավարն է Հայաստանի վաստակաւոր արտիստ Կարինէ Ղազարեանը: Փորձավարներն են՝ Անահիտ Աւետեան, Քրիստինէ Արզումանեան, Թինա Անտոն եւ Լինդա Սարգսեան: Ծրագրի սկզբում ցուցադրւեց “Արարատ” կազմակերպութիւնը ներկայացնող մի կարճ տեսաֆիլմ, որից յետոյ աղջիկները ներկայացրին 27 հայկական եւ այլ ժողովուրդների պարեր, որոնք կատարեցին ամենայն բծախնդրութեամբ:

Ծրագրի հաղորդավարն էր Սեդրակ Գոջամանեանը, որը նաեւ հանդէս եկաւ 4 ասմունքով:

Երեւան ժամանած 50 հոգանոց խմբի ոգեւորութիւնը աննկարագրելի էր: Բառերը անկարող են բացատրել այն բերկրանքը, որ ապրեցին մասնակցող աղջիկները՝ ի տես հանդիսատեսի անդադրում ծափողջոյնների:

Օժանդակող ծնողներն ու պատասխանատու կազմը ոչ մի ջանք չէին խնայել՝ լաւագոյն կերպով ներկայանալու Հայաստանի բծախնդիր հադիսատեսին: Եւ իրօք պարախումբը արդարացրեց իրեն: Հրաւիրւած բազմաթիւ արւեստագէտներ խոստովանեցին, որ իրենք սիրողական պայմաններում աշխատող խմբից չէին սպասում տեսնել նման որակ:

Ելոյթը իրենց ներկայութեամբ պատւել էին Հայաստանի արտգործնախարարութեան եւ Իրանի դեսպանութեան մշակոյթի բաժնի ներկայացուցիչները, մշակոյթի եւ գրականութեան բազմաթիւ գործիչներ, ինչպիսիք են՝ Պերճ Զէյթունցեանը, Արթուր Ութմազեանը, Յովհաննէս Բաբախանեանը, Աննա Մայիլեանը, Լիլիթ Պիպոյեանը, Շուշան Պետրոսեանը եւ ուրիշներ:

Վերջում բեմ բարձրացաւ Հ.Մ.Ա.Կ.-ի Կենտրոնական Վարչութեան նախագահ՝ ընկեր Հենրիկ Խալոյեանը, որը շնորհակալութիւն յայտնեց տկն. Կարինէ Ղազարեանին ու “Բարեկամութիւն” համոյթի գեղարւեստական ղեկավար՝ պրն. Նորայր Մեհրաբեանին եւ ելոյթը որպէս մի “ծաղկեփունջ” նւիրեց Հայաստանի անկախութեան 15-ամեակին: Ապա նա կազմակերպութեան կողմից յուշանւէրներ յանձնեց տկն. Կարինէ Ղազարեանին, պարարւեստի “Բարեկամութիւն” պետական համոյթի գեղարւեստական ղեկավար, վաստակաւոր արտիստ եւ Մովսէս Խորենացու անւան մեդալակիր՝ Նորայր Մեհրաբեանին եւ Հայաստանի պարարւեստի գործիչների միութեան նախագահ, Հայաստանի ժողովրդական արտիստ՝ Վանուշ Խանամիրեանին:

Վերջինս արտայայտւելով՝ բարձր գնահատեց Կ. Ղազարեանի եւ խմբի կատարած բծախնդիր ու տքնաջան աշխատանքը եւ միութեան անունից մի պատւոյ գիր շնորհեց՝ պարախմբին ու մի գեղանկարչութիւն՝ “Արարատ” կազմակերպութեանը: Հ.Մ.Ա.Կ-ի կողմից յուշանւէրներ ստացան նաեւ մասնակցող բոլոր պարուհիները:

Սեպտեմբերի 12-ին խումբը մեկնեց Էջմիածին, ուր ներկայ եղաւ Մայր տաճարում եւ այցելեց թանգարանը, այնուհետեւ Էջմիածին քաղաքի Կոմիտասի անւան մշակոյթի տանը հանդէս եկաւ 10 պարով. երկու պարով՝ ելոյթ ունեցաւ նաեւ տեղի պարախումբը: Վերջում Էջմիածնի քաղաքապետը բարձր գնահատեց տկն. Կարինէի եւ խմբի աշխատանքը եւ նոյն քաղաքապետարանի անունից մի պատւոգիր շնորհեց պարախմբին: Մասնակիցների տեսակէտից այս ելոյթը հետաքրքիր էր այն առումով, որ հանդիսատեսը բացառապէս տեղի բնակչութիւնն էր, որը ծայրէ ի ծայր լցւել էր սրահում եւ իր պարզ ու անկեղծ արտայայտութիւններով քաջալերում էր պարախմբին:

Նոյն օրը ամբողջ խումբը դիտեց Պարի Պետական Անսամբլի ելոյթը՝ Երեւանում, իսկ սեպտեմբերի 13-ին այցելեց՝ Ծաղկաձոր, Սեւան եւ Գառնի:

Սեպտեմբերի 15-ին խումբը ուղեւորւեց դէպի Թեհրան, որին յաջորդ օրը, առաւօտեան մարզաւանում դիմաւորեցին Արւեստից Միութեան եւ Կենտրոնական Վարչութիւնների ներկայացուցիչները եւ խմբի անդամների ազգականները:

Գովազդ եւ արձագանգեր

Ելոյթից դեռ 10 օր առաջ Օպերայի ճաղերին փակցւած էր համապատասխան մեծ պաստառը եւ Թեհրանից ուղարկւած աֆիշներին կարող էիր հանդիպել քաղաքի տարբեր տեղերում:

Համերգին նախորդող ամբողջ շաբաթւայ ընթացքում “Հայաստանի հանրային” (Հ1), “Երկիր Մեդիա” եւ “Շանթ” հեռուստաընկերութիւնները սփռեցին գովազդ (վերջին երկուսը անվճար), որը դարձեալ անվճար կերպով պատրաստել էր “Երկիր Մեդիա”-ն:

Սեպտեմբեր 7-ին եւ 8-ին ուղիղ եթերով հարցազրոյց կազմակերպւեց հերթաբար “Երկիր Մեդիա” եւ “Հանրային” հեռուստաընկերութեան առաւօտեան համապատասխան ծրագրերում, մասնակցութեամբ տկն. Կարինէ Ղազարեանի եւ Կենտրոնական Վարչութեան անդամ՝ ընկեր Կարինէ Ղարախանեանի (Երկիր Մեդիա) եւ Արւեստից Միութեան նախագահ՝ ընկեր Արմինէ Զէյթունցեանի (Հ1):

Հարցազրոյցների ընթացքում ցուցադրւեց Հ.Մ.Ա.Կ.-ի պատրաստած ֆիլմից մի բաժին եւ ծանօթացւեց Արարատ Կազմակերպութիւնը ընդհանրապէս եւ “Արարատ” պարախումբն ու կայանալիք ելոյթը մասնաւորապէս: