Տօնւեց Հայ Մշակութային

«Արարատ» կազմակերպութեան 64-րդ տարեդարձը եւ
Կատարւեց Հ.Մ.Ա.Կ.-ի 60-ամեակի առիթով

հրատարակւած գրքի շնորհանդէսը

Յուլիսի 5-ին, «Արարատ» մարզաւանի լողաւազանների շրջափակում մեծ հանդիսութեամբ տօնւեց Հ.Մ.Ա.Կ.-ի 64-րդ տարեդարձը: Ծրագրի սկզբում հնչեց Հ. Մ. «Արարատ» կազմակերպութեան հիմնը, ապա բացման խօսքն ընթերցեց Ալենուշ Այւազեանը:

Տօնակատարութեանը հրաւիրւած էին՝ Իսլ. խորհրդարանում հիւսիսային իրանահայութեան պատգամաւոր ճրտգ. Գէորգ Վարդանեանը, Թ. Հ. Թեմական խորհրդի, ազգային մարմինների, քոյր միութիւնների եւ «Ալիք» հաստատութեան ներկայացուցիչները, Հ.Մ.Ա.Կ.-ին հովանաւորող բարեկամները եւ միութենական անդամները:

Օրւայ առթիւ նախ արտայայտւեց Հ.Մ.Ա.Կ.-ի Կենտրոնական վարչութեան նախագահ Էդւարդ Բաբախանեանը: Նա ներկաներին շնորհաւորեց կազմակերպութեան հիմնադրման 64-րդ տարեդարձը եւ յոյս յայտնեց, որ միութենականների, «Արարատ»-ի հովանաւորների, ազգային իշխանութեան եւ բոլոր բարեկամների համատեղ ջանքերով ու միասնական աշխատանքով կազմակերպութիւնը շատ երկար տարիներ շարունակի իր կեանքը:

Նա հակիրճ կերպով անդրադարձաւ Հ.Մ.Ա.Կ.-ի անցեալ տարւայ գործունէութեանը եւ նշեց իրաւա-կալւածային, մարզական եւ մշակութային ասպարէզներում ձեռքբերւած յաջողութիւնները:

Այնուհետեւ Հ.Մ.Ա.Կ.-ի Կենտր. վարչութեան եւ Մարզական միութեան վարչութեան կողմից գնահատագրեր եւ յուշանւէրներ շնորհւեցին «Արարատ»-ի աղջկանց բասկետբոլի խմբի մարզուհիներին, Թեհրանի լիգայի մրցութիւնների ընթացքում եւ երկրի մակարդակում նրանց ձեռք բերած նշանակալից մարզական յաղթանակների համար: Գնահատագրեր եւ յուշանւէրներ ստացան նաեւ աղջկանց բասկետբոլի խմբի պատասխանատուները:

Ապա տեղի ունեցաւ Հ.Մ.Ա.Կ.-ի 60-ամեակի առթիւ հրատարակւած գրքի շնորհանդէսը: Նախ Հ.Մ.Ա.Կ.-ի Կենտր. վարչութեան նախագահը հրաւիրեց գրքի մեկենաս եւ նւիրատու տկն. Սեդա Կուկունեանին ու նրան շնորհեց հրատարակւած գրքի առաջին օրինակը եւ կազմակերպութեան կողմից շնորհակալութիւն յայտնեց նրան: Ապա հերթականութեամբ հրաւիրւեցին վերջին շրջանների Հ.Մ.Ա.Կ.-ի Կենտրոնական վարչութեան նախագահները եւ ներկայում գործող վարչութեան նախագահը եւ նրանց տրւեցին 60-ամեակի գրքի մէկական օրինակներ: Նոյն առիթով գնահատւեցին գրքի պատրաստման ու հրատարակման խմբագրական կազմի ներկայ անդամներ՝ Կարինէ Ղարախանեանը, Արմենուշ Առաքելեանը եւ Անահիտ Աբրահամեանը:

Խմբագրական կազմի կողմից արտայայտւեցին՝ Կարինէ Ղարախանեանը եւ Արմենուշ Առաքելեանը:

Օրւայ առթիւ արտայայտւեց Իսլ. խորհրդարանում հիւսիսային իրանահայութեան պատգամաւոր ճրտգ. Գէորգ Վարդանեանը. նա բարձր գնահատեց «Արարատ» կազմակերպութեան 64-ամեայ բեղմնաւոր գործունէութիւնը:

Հանդիսութեան ընթացքում եղաւ հայկական ազգագրական պարերի ներկայացում՝ «Արարատ» պարախմբի միջոցով. ղեկավար՝ Կարինէ Ղազարեան: