Հ.Մ.Ա.Կ.-Ի
ՄԱՐԶԱԿԱՆ ՄԻՈՒԹԵԱՆ
ԱՄԱՌԱՅԻՆ ԱՇԽԱՏԱՆՔՆԵՐ

Թւականիս Օգոստոսի 11-ին, Հ.Մ.Ա.Կ.-ի «Սանսունցի Դաւիթ» սրահում տեղի ունեցաւ Կազմակերպութեան Մարզական միութեան Ամառային ծրագրերի աւարտական հանդէսը: Ծրագրին ներկայացել էին Հ.Մ.Ա.Կ.-ի Մարզական միութեան վարչութեան անդամները և աշակերտների ծնողները: Հանդէսի ընթացքում երեխաները ելոյթ ունեցան երգերով, պարերով ու մարզական ցոյցերով: Ամառային ծրագրի ուսուցիչները նախասրահում ցուցահանդէս էին կազմակերպել երեխաների նկարչութիւններից, ձեռքի աշխատանքներից ու նաև այս 6 շաբաթների երեխաների աշխատանքների նկարներից:

Այս տարի Ամառային աշխատանքները սկսւեց յունիսի 28-ին և շարունակւեց մինչև օգոստոսի 20-ը: Աշխատանքները սկսւում էին առաւօտեան ժամը 9-ից մինչև ժամը 12-ը:

Մարզական վարչութիւնը Ամառային աշխատանքների ընդհանուր պատասխանատու էր նշանակել Քաթրին Քարիմեանին: Համագործակցութեան էին հրաւիրւել լաւագոյն դաստիարակներ ու մասնագէտ մարզիչներ: Այս տարի Ամառային դասընթացներին մասնակցել էին շուրջ 200 երեխաներ:

5-8 տարեկան երեխաների համար նկատի էր առնւել մարմնամարզութիւն, բասկետբոլ, ֆուտբոլ, տեկւանդօ, ժայռամագլցում և լող մարզաձևերը: Այդ տարիքի երեխաների համար նաև կազմակերպւել էր նկարչութեան, պարի, երգի, խեցեգործութեան դասընթացներ: Իսկ 8-13 տարեկան երեխաների համար կազմակերպւել էր շաբաթական երեք պահ ֆուտբոլի, բասկետբոլի, սկէյտի, տեկւանդոյի և թենիսի մասնագիտական դասընթացներ: Հարկ է նշել, որ բոլոր աշակերտ-ուհիները օգտւել են Մարզաւանի լողաւազաններից:

Մարզական աշխատանքներին զուգընթաց կատարւեց զանազան աշխատանքներ, որոնցից կարելի է նշել վարդավառի տօնակատարութիւնը Ս.Խաչ մատուռի շրջափակում: Նաև 6-8 տարեկան երեխաների համար այցելութիւն էր կազմակերպւել «Ձի արշաւի» կենտրոն: