|
Հ.Մ.Ա.Կ.-ի «Արարատ»
պարախմբի ելոյթը՝
«Արարատ» մարզաւանի
«Սասունցի Դաւիթ» սրահում
Հ.Մ.Ա.Կ.-ի Արւեստից Միութեան
նախաձեռնութեամբ 2008 թ. նոյեմբերի 20-ին, «Արարատ»
մարզաւանի «Սասուցի Դաւիթ» սրահում, շուրջ 1500
հանդիսատեսի ներկայութեամբ, տեղի ունեցաւ «Արարատ»
պարախմբի տարեկան ելոյթը՝ ղեկավարութեամբ Հայաստանի
վաստակաւոր արտիստ պարուսոյց՝ Կարինէ Ղազարեանի: Պարախմբի
տարեկան ելոյթը նւիրւած էր Հայաստանի պարարւեստի պետական
«Բարեկամութիւն» վաստակաւոր համոյթի 20-ամեակին:
Ձեռնարկին ներկայ էին Թ. Հ. Թեմի առաջնորդ
Տ. Սեպուհ, արք. Սարգսեանը, Թ. Հ. Թեմական խորհրդի
ներկայացուցիչները, Իրանում Հայաստանի Հանրապետութեան
դեսպանը, «Ալիք» օրաթերթի, ազգային իշխանութեան,
մարմինների ու միութիւնների ներկայացուցիչները եւ մեծ թւով
հանդիսատեսներ:
Բացման խօսքով հանդէս եկաւ Անժէլ
Մինասեանը, որն իր խօսքերի մէջ անդրադարձաւ, թէ 64-ամեայ
Հ.Մ.«Արարատ» կազմակերպութիւնը կառչած մնալով իր
առաքելութեան եւ ազգանպաստ գործունէութեան անշեղ
ընբռնումին, այսօր բովանդակ ուժերով կանգնած է իրեն բնորոշ
դիրքում, որի պերճախօս վկան է՝ «Արարատ» պարախմբի այս
հանդիսաւոր ելոյթի ներկայացումը մարզաւանում:
Նա ասաց. «Արարատ» պարի դպրոցը մի անգամ
եւս փաստելու համար իր բարեկամութիւնը Հայաստանի
«Բարեկամութիւն» պետական համոյթին եւ նրա գեղարւեստական
ղեկավար՝ Հայաստանի Հանրապետութեան ժողովրդական արտիստ՝
Նորայր Մեհրաբեանին, այս տարւայ ելոյթը նւիրում է
Հայաստանի Հանրապետութեան պարարւեստի «Բարեկամութիւն»
ժողովրդական համոյթի 20-ամեակին, որպէս երախտագիտութեան
նւազագոյն հաւաստիք՝ «Արարատ» կազմակերպութեանն իր
աջակցութիւնը ցուցաբերելու համար: Այսօր, «Արարատ» պարի
դպրոցը իր 96 անդամուհիներով փորձում է կատարել
ամենակարելին, թէ Հ. Մ. «Արարատ» կազմակերպութեան, թէ
«Բարեկամութիւն» համոյթի անունը վեր պահելու ի խնդիր:
Օրւայ հաղորդավարը ներկաների համար
ընթերցեց, «Բարեկամութիւն» համոյթի գեղարւեստական դեղավար
եւ ՀՀ ժողովրդական արտիստ Նորայր Մեհրաբեանի յղած
շնորհաւորական ուղերձը:
Այնուհետեւ «Արարատ» պարախումբը հանդէս
եկաւ ազգային-ժողովրդական եւ այլ պարային գեղեցիկ ելոյթով:
Ուշագրաւ է, որ «Արարատ» պարախմբի դպրոցի
սաները լաւագոյն կերպով կատարեցին իրենց պարային ելոյթը,
որն արժանացաւ հանդիսատեսների բուռն ծափահարութեանն ու
խրախուսանքին: Յատկանշական է որ, պարախմբի սաներն իրենցից
դրսեւորեցին պարարւեստի բաւականին բարձր մակարդակի
ներկայացում, որն ապացուցում է նրանց պատրաստւածութեան եւ
կատարած փորձերի զարգացումն ու աստիճանը:
Ձեռնարկի վերջում բեմ հրաւիրւեց Հ.Մ.Ա.Կ.-ի
Կենտրոնական Վրաչութեան նախագահ ընկ. Էդւարդ Բաբախանեանը,
որը շնորհակալութեան եւ գնահատանքի խօսքը յայտնեց «Արարատ»
պարախմբի դպրոցի սաներին եւ կազմակերպութեան կողմից
պարգեւատրեց պարախմբի վաստակաւոր պարուսոյց Կարինէ
Ղազարեանին:
Ծրագրի աւարտին իր օրհնանքի եւ գնահատանքի
խօսքն արտայայտեց թեմակալ առաջնորդ Տ. Սեպուհ արք.
Սարգսեանը, որը նշեց թէ արւեստի բնագաւառում աշխատող
իւրաքանչիւր անձ, իր ներգործօն ծառայութիւնն է նւիրաբերում
հայ ժողովրդական արւեստի ու մշակոյթի զարգացման ու
պահպանման սուրբ գործին, որն արժանի է ամենաբարձր
գնահատանքի: Այս երեւոյթը չի բացառում Հ.Մ.Ա.Կ.-ի «Արարատ»
պարախմբի պարագային, որի պարային ելոյթը գալիս է փաստելու
մեր ժողովրդի մշակութային բարձր կարողականութիւնը եւ մեր
համայնքի անկոտրում կենսունակութիւնը:
Ձեռնարկի վերջում «Արարատ» պարախմբի դպրոցի
սաները գնահատւեցին ծաղկեկողովներով, հանդիսատեսների ջերմ
ու բաւարարւած ծափահարութիւններին արժանանալով: |
