|
140 Պլուս 20
Բարեբաստիկ յոբելեաններ՝
Հ.Մ. «ԱՐԱՐԱՏ»
ԿԱԶՄԱԿԵՐՊՈՒԹԵԱՆ ՅԱՐԿԻ ՏԱԿ
«Մեր պատմութեան մի լուսաւոր էջը, մեզ
դասել է քաղաքակիրթ ժողովուրդների շարքում... Դա մեր
մշակոյթն է։ Դարերի ընթացքում թատրոնը եղել է Հայկական
մշակոյթի անբաժան եւ կարեւոր մասնիկը...»
Իբրեւ բացման խօսք՝ ահա այս բառերով սկսեց
«ՀՄԱԿ»–ի արդէն քսան տարեկեան դարձած՝ «Շանթ» եւ «Շանթիկ»
թատերախմբի հերթական վերջին ներկայացումների բեմադրութեան
արարները՝ Կազմակերպութեան «Կոմիտաս» սրահում՝ թւականիս
Ուրբաթ հոկտեմբերի 30–ի երեկոյեան։
Թէեւ դրան նախորդող օրերին եւս նոյնը
կրկնւել էր նւիրւած՝ Ամենայն Հայոց բանաստեղծ՝ Յովհաննէս
Թումանեանի ծննդեան 140 ամեակին եւ կազմակերպութեան «Շանթ»
եւ «Շանթիկ» թատերախմբերի հիմնադրման 20–րդ տարեդարձին,
սակայն այդ օրւայ ելոյթին ներկայ էին նաեւ Իսլամական
խորհրդարանում զոյգ պատգամաւորներ՝ պրն. պրն. Ռոբերտ
Բեգլարեանն ու Գէորգ Վարդանեանը եւ Թեմի ազգային
իշխանութիւնների ու մարմինների ներկայացուցիչները։
Շաղիկ Ջորջեանի եւ խմբի վաստակաւոր
անդամուհի Լուսինէ Յովհաննիսեանի միջոցով ընթերցւած
խօսքերում, ուր թարգմանւում էին կազմակերպութեան
Կենտրոնական Վարչութեան ու թատերախմբի դիտանկիւնները,
դրսեւորւեցին ոչ միայն հայկական քաղաքակրթութեան,
մշակոյթի ու մանաւանդ թատերական անցեալի ու Հայ
ժողովրդի պատմութեան կապակցութեամբ, այլեւ
երախտագիտութեամբ յիշւեցին թատերախմբի այն անդամ–ուհիներն
ու նեցուկ հանդիսացողները, որոնք զոհւեցին անցեալ տխուր
յուլիսին Թեհրան–Երեւան չւերթի ընթացքում։
Նոյները շեշտւեցին նաեւ բեմադրութիւնից
առաջ պաստառի վրայ ցուցադրւող թատերախմբի անցեալ քսան
տարին ամփոփող տեսաժապաւէնի մէջ։
+++
Ներկայացումներն իրականացւում էին ՝
Յովհաննէս Թումանեանի ծննդեան 140 ամեակի եւ
կազմակերպութեան «Շանթ» եւ «Շանթիկ» թատերախմբերի
հիմնադրման 20–րդ տարեդարձի, առիթով՝ խմբի կնքահայր
համարւող՝ բեմադրիչ պրն. Ռուբէն Մ. Պետրոսեանի
բեմադրութեամբ։
Այս առիթով նկատի էին առնւել Յովհաննէս
Թումանեանի գրչին պատկանող ու այնքան յուշեր թարմացնող՝
«Շունն ու Կատուն», «Չարի վերջը», «Կիկոսի Մահը» եւ
«Բարեկենդան» թատերգութիւնները, որոնք հրապարակւեցին
ընդհանուր՝ «ԲԱՐԵԿԵՆԴԱՆ» խորագրի ներքոյ։
Այս ներկայացման կարեւոր իւրայատկութիւնն
այն էր, որ իւրաքանչիւր արարի սկզբում, պատմիչների միջոցով
ներկայացւող խօսքերի մէջ ընդգրկւում էին Յովհաննէս
Թումանեանի կեանքը, պատանեկութիւնը, հոգեմտաւոր
ապրումներն ու ներաշխարհը, հայ ժողովրդի մշակոյթն ու
գրականութիւնը եւ դրանց տեղն ու դիրքը՝ միջազգային
գրականութեան, մշակոյթի եւ թատրոնի ասպարէզներում։
Ներկաների գնահատական ծափահարութիւններով,
աւարտւեցին չորս ներկայացումներն ու վերջում ներկաները
բեմադրութեան բոլոր դերակատարներին ողջոյններով ու
ծաղկեկողովներով գնահատեցին բեմահարթակի վրայ։
Իսկ վերջում իր գոհունակութեան ու
գնահատանքի խօսքն ասաց իսլամական Խորհրդարանում Թեհրանի եւ
հիւսիսային իրանահայութեան պատգամաւոր՝ Ճրտգ. Գէորգ
Վարդանեանը։
Հ.Մ.Ա.Կ.-ի
Հանրութեան հետ կապ |
