Հ.Մ.Ա.Կ.-ի Երէցների Միութիւն

Պատմական նախադրեալներ

1962 թւականի ապրիլին ժամանակի դիւան-վարչութեան առաջարկով եւ ընդհանուր ժողովի հաստատումով, մի շարք կառուցային փոփոխութիւններ տեղի ունեցան, որոնց հետեւանքով Հայ Մշակութային Արարատ միութիւնը վերակազմաւորւեց, կոչւելով՝ Հայ Մշակութային “Արարատ” Կազմակերպութիւն բաղկացած չորս միութիւններից Երէցների, Սկաուտական, Արւեստից եւ Մարզական:

Երէցների միութեան հիմնադրութիւն

Կառուցային փոփոխութիւնների լոյսի տակ, նաեւ այն օրերին գոյութիւն ունեցող դժւարութիւնների պատճառով, երբ աւելի զգալի էր դարձել փորձառու անդամների պակասը, ժամանակի վարչութիւնը մի հրաւէր է կազմակերպում՝ որին մասնակցում էին մի շարք նախկին միութենականներ: Հանդիպման ընթացքին ներկաների սեփականութիւն դարձնելով ժամանակի խնդիրները դիմում է նրանց ասելով՝ “Սիրելի Երէց Արարատականներ, հնուց եկած խօսք է, Ծառն՝ արմատով է ծառ, Տունը հիմքով տուն”:

Այսպիսով իր կոչն է ուղղում բոլորին կրկին անգամ իրենց մասնակցութիւնը բերելու Արարատի աշխատանքներին, ներկաները խանդավառութեամբ ընդառաջելով կոչին, վերանդամագրւում են:

Եւ ահա 1964 թւականին նախկին անդամների միջոցով, հիմնադրւում է Երէցների Միութիւնը, երբ Արարատն արդէն իսկ քսան տարեկան էր:

1964-ի յուլիսի 4-ին մեծ շուքով տօնւեց Հ.Մ.Ա.Կ.-ի հիմնադրութեան տարեդարձը:

Այս թւականից սկսեալ արդէն երկու սերունդ Արարատականներ կողք-կողքի աշխատանք են տարել Կազմակերպութեան յարկի տակ, յանուն Արարատի վեհ նպատակների:

    Երէցների Միութիւնը իր գործունէութեան առաջին տասնամեակում աշխատանք է տարել իբրեւ մէկ միաւոր, սակայն նրա աշխատանքների ծիրում ներառւած են եղել զանազան բնագաւառի աշխատանքներ:

Երէցների միութեան ընդհանուր  նպատակ

Իր կազմաւորման առաջին իսկ օրից միութեան կարեւորագոյն նպատակն է եղել կազմակերպութեան բոլոր աշխատանքներում ի պահանջեալ հարկին, օժանդակել զանազան միութիւններին եւ յանձնախմբերին, ի մի բերելով կազմակերպութեան անցեալ ունեցող անհատներին, որոնք լինելով աւելի տարեց եւ փորձառու, նաեւ ունենալով միութենական եւ ազգային դաստիարակութիւն թէրեւս աւելի ճիշտ կերպով կը ծրագրեն եւ կը գործադրեն որեւէ աշխատանք եւ այսպիսով կը նպաստեն կազմակերպութեան նպատակների իրագործման: